Новиот жител на струшкиот затвор, Сашо Мијалков, кој денес сам се пријави за отслужување на тригодишната казна за перење пари, веднаш доби тромесечен награден отпуст, поради, како што рекоа од управата на затворот „позитивниот пример што го оставил за сите други затвореници“.
- Најпрвин, би сакал да му се заблагодарам на господинот Мијалков што го избра нашиот затвор и да му посакам брзо и лесно одлежување на казната. Со неговиот денешен, неверојатно културен гест - да се појави на капијата во договореното време, тој уште повеќе порасна во моите очи и поради тоа, ние како ДУИ управа, решивме да го наградиме со 3 месечно паузирање на казната, кое ќе стапи на сила веднаш! – изјави управникот на струшкиот затвор.
Тој појасни дека доколку поранешниот директор на УБК го повтори делото и пак се врати на време после истекот на отпустот, уште еднаш ќе биде награден за својата прецизност, но овој пат ќе мора да остане надвор од затворот до крајот на неговата затворска казна.
