Само високообразовани граѓани, со диплома од универзитетот на струшкиот градоначалник Рамиз Мерко, од утре ќе смеат да се движат низ поширокиот центар на Струга, откако струшките власти решија да ја дополнат црната листа, на која веќе беа ставени костимите за капење.
- Сакаме Струга да ни биде полна со интелектуалци и затоа избравме универзитет во кој дипломите се добиваат со знаење - мојот! Сепак добра вест е тоа што сите кои ја немаат потребната диплома, ќе можат експресно да станат академски граѓани по специјална летна цена од неверојатни 999€. - изјави градоначалникот.
За спроведување на оваа мерка општината ќе формира специјална антинеписмена единица, која ќе го контролира движењето и ќе издава дипломи и магистерски на сите заинтересирани купувачи на знаење т.е. дозволи за движење.
