Само неколку часа откако министерката за образование, Мила Царовска, објасни дека со печатените учебници родителите им прават штета на децата, илјадници и илјадници родители побрзале да ги однесат своите деца во центар за рехабилитација за да им помогнат и да ги вратат на правиот пат.
- Овој нашиов има 10 години и по цел ден чита книги. Му велиме, а бе оди застани некој саат пред компјутер како нормално дете, ама тој не и не! Кај и да одиме не’ срами. И решивме, доста го гледаме како пропаѓа затоа што е наивен и се навлекол на хартија, туку дај да го носиме некаде да се лечи. Затоа ќе го оставиме неколку недели на терапија, а тоа време ќе го искористиме да ги запалиме сите книги што ни се вртат по дома за да го спасиме. Се надевам ќе успееме. – ни рекоа родителите на едно од децата кои ќе одат на рехабилитација.
Како што дознаваме, најголем дел од родителите се со деца на возраст помеѓу 10 и 14 години, што значи се работи за зависници кои подолго време биле во контакт со овој порок и веќе имаат развиено голема толеранција на него.