Откако претседателот на Регулаторната комисија, Марко Бислимовски, дојде до револуционерно откритие дека скалите во зградата каде работи водат директно до неговата канцеларија и со тоа постави нови стандарди за штедење во државните институции, неговиот колега по килажа и љубов кон добрата храна, Бојан Маричиќ, реши да го следи неговиот пример и да се жртвува за доброто на граѓаните.
- Несебичниот потег на колегата Бислимовски, кој го стави во ризик сопственото здравје само за да заштеди, ме потикна и јас да сменам нешто и затоа од утре – нема веќе леб. Разговарав и со нутриционисти, кои ме предупредија дека поради наглото исфрлање на лебот можно е да трошам повеќе на бифтек, ребра, кременадли...но спремен сум да го преземам тој ризик за ваше добро! – изјави заменик министерот Маричиќ.
Поддршка за неговата храбра одлука пристигна и од неговиот шеф, претседателот на Владата, Димитар Ковачевски, кој за да покаже солидарност со својот потчинет, од утре нема да користи шампон за коса при туширањето со тенок млаз вода.
