МАЈСТОР ЅВОНЧЕ
Ѕвонче е омнизанаетчија. Тој е ѕидар, плочкар, столар, косач на трева, местач на кровови, заварувач, електричар, водоинсталатер,.. но најпознат е како молер. Целата населба го познава како Белиот, но има уште неколу имиња: Варос, Креч и Ваљакот. Ѕвонче е еден од најлошите мајстори во познатиот универзум. Тој не знае да направи ништо како што треба, но ги сака канаринците, колибрите и сите нежни џивџани кои не се поголеми од ноктот на неговиот палец. Кога е сам со своите птици, од џин се претвора во свилен пердув и летка со своите песнопојки низ населбата како вилинско коњче над езеро полно со златни рипки, додека бели капки поликолор капат од неговата хартиена капа во форма на бротче.
