Љубимиројавление
љубам луѓе будалишта,
далдисани. јуродиви. месечари.
самовилничари. пијаничишта.
одлепени, удрени, пернати
со ровја по глава. луѓе
со мокри погледи и ѕвезда
меѓу очи. изгубени
во хронотопот на приказната.
луѓе деца во години.
кои најаве зборат
исто ко насон. гласно и
со зборот право в чело!
луѓе исфрлени од
поплавата на чаршијата.
навикнати на самотија
и бескрајни монолози.
и сиот тој нивни свет,
кој светот не го разбира!
луѓе-отстапки љубам.
зашто без нив
нема поезија.
